Watu wasiopungua wanne wamefariki dunia na wengine 35 kujeruhiwa baada ya moto kuzuka katika kituo cha kuzalisha umeme kusini mwa Iraq siku ya Jumamosi. Kwa mujibu wa maafisa wa usalama, idadi ya vifo inatarajiwa kuongezeka.
Shirika la habari la serikali ya Iraq, INA, liliripoti kuwa vikosi vya ulinzi wa raia vilifanikiwa kuudhibiti moto huo katika kituo cha umeme cha Hartha, kaskazini mwa Basra, baada ya wazima moto kufika eneo la tukio.
Maafisa wa usalama walieleza kuwa moto huo ulisambaa hadi kwenye nyumba za jirani na kulazimisha shughuli za kituo hicho kusimamishwa.
Kwa mujibu wa Kitengo cha Habari za Usalama cha Iraq (Security Media Cell), moto ulizuka majira ya saa 12 asubuhi (0300 GMT). Wengi wa waathiriwa walikuwa wakazi wa nyumba zilizoathirika, ambao walipata majeraha ya moto na matatizo ya kuvuta moshi.
Wizara ya Umeme ya Iraq ilisema tukio hilo lilihusisha bomba la gesi linalosambaza nishati kwa kituo hicho cha umeme.
Ofisi ya Waziri Mkuu Ali al-Zaidi ilieleza kuwa ameagiza uchunguzi wa haraka kuhusu mlipuko uliotokea kituoni hapo, ili kubaini chanzo chake na kuwawajibisha wahusika.
Hadi sasa hakuna taarifa rasmi kuhusu kilichosababisha tukio hilo wala ukubwa kamili wa uharibifu. Picha kutoka eneo la tukio zilionyesha sehemu za bomba la gesi zilizoharibika vibaya, huku ardhi inayozunguka ikiwa imeungua na kuwa nyeusi na mabaki yakiwa yametapakaa kila mahali.
Maafisa wa usalama walisema kituo cha Hartha kina uwezo uliosimikwa wa kuzalisha megawati 800, ingawa kabla ya moto kilikuwa kikifanya kazi kwa takriban megawati 400.
Kwa miongo kadhaa, miundombinu ya umeme ya Iraq imekuwa ikikabiliwa na uwekezaji mdogo, matengenezo duni na kushindwa kukidhi mahitaji ya juu ya umeme, hasa katika miezi ya kiangazi yenye joto kali. Matukio ya moto na hitilafu za kiufundi katika vituo vidogo vya kusambaza umeme na mitambo ya kuzalisha umeme yamewahi kuvuruga usambazaji wa umeme na kusababisha kukatika kwa umeme katika maeneo makubwa.
Comments
0