Mchezo wa video wa Grand Theft Auto 6 (GTA 6) unakadiriwa kuingiza dola bilioni 2.36 za Marekani (pauni bilioni 1.8) kutokana na oda za awali na mauzo ya siku ya kwanza. Kiwango hicho huenda kikaufanya kuwa uzinduzi mkubwa zaidi wa burudani katika historia.
Kwa mujibu wa jukwaa la uchambuzi wa takwimu Sensor Tower, mchezo huo uliokuwa ukisubiriwa kwa hamu kubwa uliuza zaidi ya nakala milioni 24.5 baada ya kuzinduliwa Alhamisi. Mapato hayo yanazidi yale ya filamu na kazi nyingi kubwa za burudani, ikiwemo filamu iliyoingiza fedha nyingi zaidi mwaka huu, Spider-Man: Brand New Day, iliyokusanya dola bilioni 2.5 katika kipindi chake chote cha kuonyeshwa kumbi za sinema.
Hata hivyo, Rockstar Games, kampuni iliyotengeneza GTA 6, pamoja na kampuni mama yake, Take-Two Interactive, hazijatoa takwimu rasmi za mauzo. Kampuni zote mbili zilieleza mahitaji ya mchezo huo kuwa “yasiyo na kifani”. BBC imewasiliana na kampuni hizo ili kupata maoni zaidi.
GTA 6 ni toleo jipya zaidi katika mfululizo wa michezo ya uhalifu wa Rockstar uliodumu kwa takriban miongo mitatu, na ambao umekuwa mmoja wa mfululizo wa michezo ya video iliyofanikiwa zaidi katika historia. Mfululizo huo unajulikana kwa kuikejeli ndoto ya Kimarekani (American dream), ukiwaruhusu wachezaji kuchukua nafasi ya wahalifu wanaozunguka katika miji ya kubuni na kutekeleza misheni mbalimbali.
Toleo hili jipya linawatambulisha wahusika wakuu wawili, Lucia na mpenzi wake Jason, wanaoonyeshwa kama wahalifu wadogo wanaoendesha shughuli zao katika Leonida, jimbo la kubuni lililochochewa na Florida.
Inakadiriwa kuwa utengenezaji wa GTA 6 uligharimu zaidi ya dola bilioni 1, jambo linaloweza kuufanya kuwa mchezo wa video ghali zaidi kuwahi kutengenezwa. Sensor Tower pia ilitabiri kuwa umaarufu wa mchezo huo unaweza kupunguza kwa asilimia 10 muda ambao wachezaji hutumia kwenye michezo mingine ya mchezaji mmoja.
Kampuni hiyo ya uchambuzi ilisema makadirio yake yalitokana na takwimu za risiti za barua pepe na vyanzo vingine vya takwimu vinavyofuatilia mamilioni ya watu kila siku. Pia hufuatilia wasifu wa umma kwenye majukwaa makubwa ya michezo, yakiwemo PlayStation na Xbox, ambako GTA 6 inapatikana. Kwa mujibu wa Sensor Tower, takriban robo tatu ya mauzo ilitoka kwa watumiaji wa PlayStation 5, huku robo iliyobaki ikitoka kwa wachezaji wa Xbox.
Kampuni ya utafiti wa soko la michezo ya Niko Partners imekadiria kuwa GTA 6 inaweza kuingiza zaidi ya dola bilioni 3 duniani kote mwaka huu. Kiwango hicho kingeuweka mchezo huo miongoni mwa kazi za burudani zilizoingiza fedha nyingi zaidi kuwahi kutokea, ingawa bado ungekuwa nyuma ya filamu ya mwaka 1939, Gone with the Wind, inayokadiriwa kuingiza dola bilioni 4.5 baada ya kuzingatia mfumuko wa bei.
Rockstar pia inatarajiwa kuendelea kupata mapato ya ziada kutokana na mchezo huo katika miaka ijayo.
Studio hiyo yenye makao yake New York bado haijatangaza tarehe ya kutoka kwa toleo la kompyuta (PC), wala kutoa maelezo kuhusu upanuzi wake wa wachezaji wengi (multiplayer), utakaowawezesha wachezaji kushirikiana na kukamilisha misheni pamoja mtandaoni. Kipengele hicho kinatarajiwa kurefusha maisha ya mchezo na kufungua fursa mpya za mapato kwa Rockstar.
Uzoefu huo huenda ukafanana na ule wa GTA 5, uliozinduliwa mwaka 2013, ambao hali yake ya mtandaoni ya wachezaji wengi iliongeza muda wa kucheza na kuwaruhusu wachezaji kutumia fedha halisi kununua mali, magari na vitu vingine vya ndani ya mchezo.
Hamu ya kuupata GTA 6 iliongezeka kufuatia kuahirishwa mara kwa mara kwa uzinduzi wake na kusubiri kwa miaka 13 tangu toleo kuu lililotangulia. Baadhi ya wakosoaji wameuelezea mchezo huo kuwa mmoja wa uzoefu wa kuvutia zaidi wa michezo kuwahi kutengenezwa, huku chapisho la burudani IGN likiuita kazi bora iliyobuniwa “bila kulegeza viwango vyovyote”.
Uzinduzi wa usiku wa manane siku ya Alhamisi katika kanda tofauti za saa uliwafanya maelfu ya wachezaji kukesha, huku baadhi wakiripotiwa kuchukua mapumziko kazini siku iliyofuata ili kucheza. Uzinduzi huo pia ulivunja rekodi ya matumizi ya mtandao wa jioni ya Virgin Media O2, wachezaji walipokimbilia kupakua faili kubwa la usakinishaji la GB 212 kwenye konsoli zao.
Licha ya mafanikio yake kibiashara, GTA 6 imekumbana na vikwazo katika baadhi ya masoko kutokana na maudhui yake ya vurugu na picha kali. Mchezo huo umefanyiwa udhibiti nchini Japan na, kama ilivyokuwa kwa matoleo yaliyotangulia katika mfululizo huo, haujaidhinishwa kuuzwa katika China bara.
Comments
0