Takriban wahamiaji 1,500 waliwasili katika Visiwa vya Canary vya Hispania siku ya Jumamosi, idadi kubwa zaidi kuwahi kurekodiwa kwa siku moja tangu mwaka 2020. Shirika la habari la EFE liliripoti taarifa hiyo Jumapili, likinukuu huduma ya uokoaji baharini.
Kwa mujibu wa EFE, walinzi wa pwani wa Hispania waliwaokoa jumla ya watu 1,488 waliokuwa kwenye boti 14. Idadi hiyo imevunja rekodi ya awali ya watu 1,461 waliookolewa katika maji ya Visiwa vya Canary tarehe 7 Novemba 2020, kama ilivyothibitishwa na huduma za uokoaji baharini Jumapili.
Boti kumi na mbili zilitua katika kisiwa cha El Hierro, huku boti moja ikifika Gran Canaria na nyingine Tenerife. Mamlaka zilieleza kuwa boti moja iliyowasili Jumamosi ilikuwa imebeba watu 240, wakiwemo wanawake 12 na watoto 36, ambao walipelekwa El Hierro, mojawapo ya visiwa vidogo zaidi vya Canary.
Wengi wa waliowasili walitokea Senegal, Gambia na Guinea Conakry. Ongezeko hili ni mwendelezo wa wimbi la wahamiaji kutoka nchi za Afrika Magharibi kuelekea visiwa hivyo vya Hispania lililoanza tangu Oktoba.
Takwimu za serikali zinaonyesha kuwa idadi ya wahamiaji waliowasili Visiwa vya Canary kati ya Januari na tarehe 31 Oktoba ilipungua kwa asilimia 5.5 ikilinganishwa na kipindi kama hicho mwaka jana.
Hata hivyo, ongezeko kubwa la mwezi uliopita limeongeza mzigo kwa huduma za mapokezi na za dharura katika baadhi ya visiwa, hasa vile vidogo vyenye wakazi wachache.
Waziri wa Sera za Kimaeneo wa Hispania, Angel Victor Torres, alipangwa kuzuru El Hierro Jumapili ili kujadili kuongezeka kwa idadi ya wahamiaji wanaowasili kisiwani humo.
Njia ya Bahari ya Atlantiki kutoka Afrika Magharibi hadi Visiwa vya Canary ni miongoni mwa njia hatari zaidi za uhamiaji duniani. Kila mwaka maelfu ya wahamiaji hujaribu safari hiyo wakiwa wamebanana kwenye boti, wakitafuta kufika ardhi ya Hispania licha ya mawimbi makali, mikondo yenye nguvu na umbali mrefu.
Safari hizi huongezeka zaidi wakati wa msimu wa vuli, kipindi ambacho hali ya bahari katika njia hiyo huwa tulivu na rahisi zaidi kuvuka.
Comments
0