Ofisi ya haki za binadamu ya Umoja wa Mataifa (UN) ilisema Jumanne kuwa imethibitisha vifo vya raia 2,230 katika vita vya wenyewe kwa wenyewe nchini Sudan tangu mwanzo wa mwaka huu, huku mashambulizi ya droni yakichangia karibu robo tatu ya idadi hiyo na kuibuka kuwa “sifa bainifu” ya mzozo huo.
Jeshi la Sudan limekuwa likipambana na kikosi cha Rapid Support Forces (RSF) katika vita vya wenyewe kwa wenyewe tangu Aprili 2023. Katika miezi ya hivi karibuni, pande zote mbili zimeongeza kwa kiasi kikubwa mashambulizi ya droni.
Ripoti ya UN iliyohusu kipindi cha Januari hadi Juni ilitolewa sambamba na taarifa inayoonyesha kuwa, tangu wakati huo, idadi ya vifo iliyothibitishwa na umoja huo imefikia 2,230, ambapo zaidi ya watu 1,630 waliuawa na droni. Taarifa hiyo iliongeza kuwa ukubwa halisi wa vifo huenda ni mkubwa zaidi.
Ripoti hiyo ilieleza: “Kuongezeka kwa matumizi ya ...droni kumeibuka kama mojawapo ya sifa bainifu za mzozo nchini Sudan, kukiziwezesha pande zinazopigana kufikia maeneo yaliyo mbali zaidi ya maeneo wanayoyadhibiti na mistari ya mbele ya mapigano.”
Mbali na watu wanaouawa moja kwa moja katika mapigano, taarifa ya UN ilisema droni zinazidi kulenga miundombinu inayowezesha maisha ya binadamu, kama vile vyanzo vya maji na mifumo ya kusambaza umeme.
Kamishna Mkuu wa Umoja wa Mataifa wa Haki za Binadamu, Volker Türk, alilaani kile alichokiita “kupuuza waziwazi sheria za vita” kunakofanywa na pande zinazopigana, akisema vitendo hivyo vinaweza kufikia kiwango cha uhalifu wa kivita.
Comments
0