Misri Yafungua Tena Ubalozi Wake Mjini Tripoli Baada ya Miaka 12

Misri imefungua tena ubalozi wake katika mji mkuu wa Libya, Tripoli, siku ya Jumamosi baada ya kutokuwepo kwa miaka 12, hatua inayoashiria kurejea kwa maelewano na serikali iliyo upande wa magharibi wa nchi hiyo, kwa mujibu wa taarifa ya Wizara ya Mambo ya Nje mjini Cairo.

Mabadiliko ya Msimamo wa Cairo

Hatua hii ni mabadiliko kwa Cairo, ambayo kwa muda mrefu imekuwa miongoni mwa waungaji mkono wakubwa wa kamanda wa kijeshi Khalifa Haftar, mwenye makao yake mashariki mwa Libya na ambaye ni hasimu wa serikali iliyoko Tripoli.

Kwa Nini Ubalozi Ulifungwa

Misri ilifunga ubalozi wake mjini Tripoli mwaka 2014, wakati ambapo balozi nyingi za kigeni zilifungwa kutokana na kupamba moto kwa mzozo uliosababisha serikali hasimu kujiunda katika mji mkuu na upande wa mashariki wa nchi hiyo kubwa ya Afrika Kaskazini.

Kauli ya Waziri Abdelatty

Katika taarifa hiyo, Waziri wa Mambo ya Nje wa Misri, Badr Abdelatty, alinukuliwa akisema wakati wa sherehe ya ufunguzi kuwa umuhimu wa kihistoria wa jengo la ubalozi huo “unaendana na mafungamano ya kina ya kibinadamu na kiutamaduni yanayoutambulisha uhusiano wa Misri na Libya.”

Libya Katika Machafuko Tangu 2011

Libya, nchi inayozalisha mafuta, imetumbukia katika machafuko tangu kuanguka kwa Muammar Gaddafi katika uasi ulioungwa mkono na NATO mwaka 2011.

Pande Hasimu za Mashariki na Magharibi

Mjini Benghazi, mashariki mwa Libya, kuna Jeshi la Kitaifa la Libya (Libyan National Army) chini ya kamanda wa kijeshi Khalifa Haftar, Baraza la Wawakilishi (House of Representatives), pamoja na serikali inayoongozwa na Osama Hammad.

Upande wa magharibi, mjini Tripoli, kuna Serikali ya Umoja wa Kitaifa (Government of National Unity) inayotambulika kimataifa, ikiongozwa na Waziri Mkuu Abdulhamid Dbeibah, pamoja na Baraza Kuu la Nchi (High Council of State).