Kiungo wa Argentina aliyewahi kutwaa Kombe la Dunia, Leandro Paredes, alianguka na kupoteza fahamu wakati akihojiwa na televisheni, muda mfupi baada ya kuisaidia Boca Juniors kunyakua taji la Copa Sudamericana.
Boca Juniors iliichapa Atletico Mineiro ya Brazil mabao 2-0 mjini Barranquilla, Colombia, na kutwaa ubingwa huo. Inaripotiwa kuwa kiungo huyo wa miaka 32, aliyewahi kuichezea Paris Saint-Germain, alipata shida kukabiliana na joto na unyevunyevu wa mji huo.
Kabla ya mchezo, hali mbaya ya hewa mjini Barranquilla ilikuwa gumzo, huku utabiri ukionyesha joto la hadi nyuzi joto 32 za Selsiasi na unyevunyevu wa takriban asilimia 80.
Paredes alitolewa uwanjani katika kipindi cha pili, kisha akaanguka alipokuwa akizungumza na waandishi wa habari kwenye mahojiano ya televisheni baada ya mechi. Picha za video za tukio hilo zilimwonyesha mwandishi mmoja wa habari akijaribu kumdaka alipokuwa akipoteza fahamu.
Baada ya kupatiwa huduma ya matibabu, kiungo huyo Muargentina aliweza kutembea mwenyewe hadi chumba cha kubadilishia nguo, ambako baadaye aliungana na wenzake kusherehekea ushindi.
Ili kuondoa hofu kuhusu afya yake, Paredes alitumia ukurasa wake wa Instagram baada ya mechi kuwahakikishia mashabiki kuwa yuko salama.
“Asanteni nyote kwa jumbe zenu, ilikuwa ni kizunguzungu tu,” alisema.
Kocha wa Boca Juniors, Rodolfo Arruabarrena, alisema aligundua kuwa kiungo huyo alikuwa akihangaika kuelekea mwisho wa kipindi cha kwanza.
“Alihisi kizunguzungu kuelekea mwisho wa kipindi cha kwanza,” Arruabarrena alisema. “Alipata nafuu kidogo wakati wa mapumziko, lakini baada ya dakika 10 za kipindi cha pili uliweza kuona alikuwa anahangaika.”
Paredes alianzia soka lake la kulipwa katika klabu ya Boca Juniors kabla ya kuhamia Ulaya mwaka 2015, ambako baadaye aliichezea Paris Saint-Germain.
Ushindi huo umehitimisha miaka 18 ya Boca Juniors bila taji la kimataifa. Klabu hiyo ya Argentina pia imefikisha kombe lake la 19 la kimataifa, na kuwa klabu yenye mafanikio makubwa zaidi Amerika Kusini katika mashindano ya kimataifa tangu mwaka 1960, ikiwapita wapinzani wao wa nyumbani Independiente, wenye mataji 18.
Comments
0