"Where Africa Comes to Stay Informed."
US Edition
"Where Africa Comes to Stay Informed."
Wizara ya Mambo ya Nje ya Marekani imetangaza Jumatano msaada wa ziada wa dola milioni 267 za Marekani kwa ajili ya kupambana na mlipuko wa Ebola katika eneo la Afrika ya Kati, wakati mamlaka za afya zikihangaika kudhibiti kirusi hicho hatari.
Maafisa waandamizi wa wizara hiyo walitoa tangazo hilo pembezoni mwa mkutano wa Baraza Kuu la Umoja wa Mataifa, wakitumaini kuwa mataifa mengine nayo yataahidi fedha mpya.
Lengo ni kufikia jumla ya dola bilioni 2 za kupambana na ugonjwa huo, hasa katika Jamhuri ya Kidemokrasia ya Kongo (DRC).
Mlipuko huo uligunduliwa mwezi Mei na tayari umekuwa wa pili kwa kusababisha vifo vingi zaidi katika historia iliyorekodiwa, ukitanguliwa tu na ule wa Afrika Magharibi uliotokea kati ya mwaka 2014 na 2016.
Akihutubia Baraza Kuu la Umoja wa Mataifa siku ya Jumatano, Waziri Mkuu wa DRC, Judith Suminwa Tuluka, aliuelezea mlipuko huo kama “mtihani mkubwa” kwa nchi yake.
“Kwa DRC, kupambana na janga hili ni kipaumbele cha juu kabisa. Baada ya kudhibiti milipuko 16 iliyopita, DRC inatumia utaalamu wa kisayansi na wa kiutendaji unaotambulika. Na kutokana na uhamasishaji wa kitaifa pamoja na msaada wa washirika wetu, juhudi za kukabiliana na ugonjwa huu zimeanza hivi karibuni kuzaa matokeo yanayoonekana,” alisema.
Kwa ahadi hii mpya, jumla ya fedha ambazo utawala wa Trump umeelekeza katika kukabiliana na mlipuko huo imefikia dola milioni 886 za Marekani.
Kiasi hicho kinajumuisha dola milioni 107 kutoka Wizara ya Afya na Huduma za Kibinadamu (Department of Health and Human Services), pamoja na fedha za Wizara ya Mambo ya Nje.
Kwa mujibu wa mmoja wa maafisa hao, msaada huo utazisaidia nchi husika kuudhibiti mlipuko kabla haujasambaa kutoka chanzo chake.
Fedha hizo zitaelekezwa katika ujenzi wa vituo vya matibabu, upatikanaji wa vipimo, pamoja na vifaa na dawa za kujikinga kwa wahudumu wa afya walioko mstari wa mbele.
Comments
0