"Where Africa Comes to Stay Informed."
US Edition
"Where Africa Comes to Stay Informed."
Viongozi wa kisiasa na wa biashara wa Afrika Magharibi wanataka serikali na sekta binafsi kushikamana zaidi ili kuharakisha uwekezaji, ukuaji wa viwanda na mtangamano wa kiuchumi katika kanda hiyo. Wito huo ulitolewa Jumatano jijini Lagos na Rais wa Sierra Leone, Julius Maada Bio, Gavana wa Jimbo la Lagos, Babajide Sanwo-Olu, pamoja na Tony Elumelu, mfanyabiashara mashuhuri barani Afrika na Mwenyekiti wa Heirs Holdings.
Watatu hao walizungumza katika mkutano na waandishi wa habari ulioandaliwa pembezoni mwa kikao cha wakuu wa Bodi ya Ushauri ya Sekta Binafsi ya Mkutano wa Kilele wa Uwekezaji na Viwanda Afrika Magharibi (WAIIS). Lengo la kikao hicho lilikuwa kuhamasisha mitaji ya sekta binafsi na kuandaa miradi iliyo tayari kupokea uwekezaji kabla ya mkutano huo wa kilele, utakaofanyika Freetown, Sierra Leone, kuanzia Novemba 16 hadi 18, 2026.
Rais Bio, anayeongoza mkutano huo, alikiri kuwa kwa takriban nusu karne Afrika Magharibi imezungumzia kuunganisha uchumi wake bila kuchukua hatua za kutosha kujenga soko moja la kikanda lenye nguvu. Kwa mtazamo wake, sasa ni wakati kwa serikali na sekta binafsi kulipa suala hilo uzito unaostahili kwa kujenga soko la pamoja litakalohudumia zaidi ya watu milioni 400.
“Afrika Magharibi imekuwa ikizungumzia mtangamano wa kiuchumi kwa takriban miaka 50, lakini hatujafanya vya kutosha kuunganisha uchumi wetu na kujenga soko lililounganishwa,” alisema Bio.
Aliongeza: “Kwangu mimi, mojawapo ya mambo tunayopaswa kufanya ni kuliunganisha soko hili la pamoja ili kuhudumia zaidi ya watu milioni 400. Ninaihamasisha sekta binafsi katika Afrika Magharibi na kote duniani kuungana na kuanza kuuchukulia mtangamano wa kiuchumi wa Afrika Magharibi kwa uzito zaidi.”
Kwa upande wake, Gavana Sanwo-Olu alisisitiza kuwa bara la Afrika linapaswa kuongeza uzalishaji wa bidhaa na huduma zinazotumiwa na Waafrika wenyewe, huku likipanua soko kwa wafanyabiashara kote barani. Alisema Lagos inahitaji kushirikiana na nchi nyingine za Afrika Magharibi kufungua fursa mpya na kujenga majukwaa yatakayoimarisha mshikamano wa kikanda.
“Tumesema mara kadhaa kwamba Afrika inahitaji kujenga kile ambacho Waafrika watatumia na kile ambacho Waafrika watakula. Hiyo ndiyo fikra iliyo nyuma ya mpango huu,” alisema gavana huyo. “Kwa Lagos, na kwa hakika Afrika Magharibi, lazima tuanze kufanya kazi pamoja na kutambua fursa zilizopo katika kujenga soko kubwa zaidi na kuhakikisha kuwa kuna dhamira ya makusudi zaidi katika kujenga majukwaa yanayoweza kutuleta pamoja.”
Sanwo-Olu alitaja teknolojia, kilimo na sekta nyingine za uzalishaji kuwa nguzo muhimu za kuunganisha uchumi na kuzalisha fursa katika kanda, akiongeza kuwa Lagos iko tayari kushirikiana na wadau na viongozi wa kisiasa kugeuza malengo ya kikanda kuwa fursa halisi za kiuchumi.
Elumelu, ambaye ni Mwenyekiti Mwenza wa mkutano huo, alisema wafanyabiashara wamefarijika kuona viongozi wa kisiasa wakiwaleta pamoja na serikali ili kuharakisha maendeleo ya kiuchumi. Mwanzilishi huyo wa Taasisi ya Tony Elumelu (TEF), anayeeneza falsafa ya Africapitalism inayohimiza maendeleo yanayoongozwa na sekta binafsi na ujasiriamali barani Afrika, alisema ushirikiano imara wa kikanda utasaidia kuzalisha ajira kwa vijana na kupanua fursa za ustawi kote Afrika Magharibi.
“Ninataka pia kuzungumza kwa niaba ya sekta binafsi ya Afrika na Afrika Magharibi. Tunafurahi kwamba viongozi wetu wa kisiasa wanaanza kutuleta sote pamoja ili tuweze kuleta matokeo makubwa zaidi,” alisema Elumelu. “Hili linaendana na matarajio yetu ya kuzalisha ajira kwa vijana wetu na kuhakikisha kwamba kila mtu ndani ya kanda hii anapata fursa ya kustawi.”
Elumelu anaamini kuwa kanda hiyo tayari ina rasilimali, nguvu kazi na uwezo wa kijasiriamali unaohitajika kujenga uchumi imara. “Tuna kila kinachohitajika. Tuna rasilimali, watu na ari ya ujasiriamali ya kujenga Afrika Magharibi yenye ustawi,” alisema, akieleza matumaini kuwa mkutano huo utafungua ukurasa mpya wa ushirikiano wa kiuchumi, mtangamano na ustawi wa pamoja.
Mpango wa WAIIS unakuja wakati Jumuiya ya Kiuchumi ya Nchi za Afrika Magharibi (ECOWAS) ikiadhimisha miaka 50 tangu ilipoanzishwa mwaka 1975. Wanaounga mkono mpango huo wanasema ushirikiano wa kina zaidi wa kikanda bado ni muhimu ili kupanua biashara, uwekezaji na maendeleo ya viwanda.
Mkutano huo wa kilele umebeba kaulimbiu “Kuchochea Mtangamano wa Kikanda kupitia Biashara ya Nishati, Madini ya Kimkakati, Biashara ya Kilimo na Mabadiliko ya Kidijitali.” Unatarajiwa kuwakutanisha Wakuu wa Nchi, mawaziri, wawekezaji, taasisi za fedha za maendeleo, viongozi wa biashara na wamiliki wa miradi, ili kuunganisha vipaumbele vya kanda na mitaji, ubia na fursa zilizo tayari kwa uwekezaji.
WAIIS itajikita katika miradi yenye thamani ya zaidi ya dola bilioni 180 chini ya nguzo nne za kimkakati: biashara ya nishati na ukuaji wa viwanda; madini ya kimkakati na uendelezaji wa maliasili; biashara ya kilimo na mageuzi ya mifumo ya chakula; na mabadiliko ya kidijitali na muunganiko.
Lengo kuu ni kuandaa miradi ya kikanda inayokopesheka (bankable) itakayovutia mitaji ya umma na ya binafsi, huku ikiboresha upatikanaji wa nishati, usalama wa chakula, maendeleo ya viwanda na muunganiko wa kidijitali.
Waandaaji wamesema mkutano huo hautaishia kwenye matangazo ya uwekezaji pekee, bali utafuatilia ahadi zitakazotolewa na kusukuma mbele utekelezaji wa miradi kupitia Sekretarieti ya WAIIS.
Comments
0