"Where Africa Comes to Stay Informed."
US Edition
"Where Africa Comes to Stay Informed."
Raia wasiopungua 72 waliokuwa wakitafuta dhahabu wamepoteza maisha baada ya mashambulizi ya anga kulenga maeneo ya uchimbaji katika jimbo la River Nile nchini Sudan, karibu na mpaka na Misri, kwa mujibu wa kundi la kutetea haki za binadamu la Emergency Lawyers.
Kwa mujibu wa kundi hilo, ndege zilivamia maeneo ya wachimbaji wadogo na kambi zao siku ya Jumamosi, na kuyasambaratisha mashimo ya kuchimba dhahabu wakati wafanyakazi bado walikuwa ndani. Emergency Lawyers lilisisitiza kuwa idadi ya vifo iliyotolewa ni ya muda tu, na huenda ikapanda kadri taarifa zaidi za waathirika zinavyopatikana.
Mashuhuda walilieleza gazeti la Sudan Tribune, lenye makao yake mjini Paris, kwamba shambulio lilianza mnamo saa 12 asubuhi kwa saa za eneo hilo siku ya Jumamosi, na ndege zilirusha zaidi ya makombora matano kwenye kambi za wachimbaji. Inaelezwa kuwa makazi ya muda pamoja na mashimo ambamo watu walikuwa wakifanya kazi yaliharibiwa.
Sudan Tribune liliripoti kuwa huenda waliofariki ni wengi kuliko idadi iliyotajwa na Emergency Lawyers. Gazeti hilo lilimnukuu manusura mmoja aliyesema kuwa watu wengi zaidi walijeruhiwa katika shambulio hilo.
Emergency Lawyers liliyalaani vikali mashambulizi hayo, likisema kuwashambulia wachimbaji ambao ni raia ni kinyume cha sheria za kimataifa, na kwamba tukio hilo linaibua maswali kuhusu uwezo wa Sudan kudhibiti ardhi yake.
“Kuwalenga kwa makusudi raia wasio na silaha kunakiuka sheria ya kimataifa ya kibinadamu na haki ya kuishi,” kundi hilo lilieleza katika taarifa iliyotolewa Jumapili. “Vitendo hivi vinaweza kuwa uhalifu wa kivita.”
Kundi hilo liliongeza kuwa shambulio hilo la karibuni linazua hofu kuhusu mamlaka ya Sudan juu ya ardhi yake na uwezo wa vyombo vya dola kuwalinda raia katika eneo la mpakani.
Hadi sasa, si serikali ya Misri wala mamlaka zinazoitawala Sudan kwa sasa zilizotoa kauli kuhusu mashambulizi hayo, na hakuna kati ya serikali hizo mbili iliyokiri hadharani kuhusika. Mazingira kamili ya tukio hilo la Jumamosi bado hayajawa wazi.
Tukio hili linakuja baada ya madai ya awali kwamba vikosi vya Misri viliwalenga wachimbaji wadogo wa dhahabu katika eneo hilo hilo. Mwezi Juni, Sudan Tribune liliripoti madai kuwa vikosi hivyo vilitumia ndege zisizo na rubani (drones) na mizinga kushambulia maeneo ya uchimbaji, na kuua watu kadhaa. Taarifa nyingine zilieleza kuwa walinzi wa mpaka walichoma moto vifaa vya uchimbaji na makazi ya muda, na kufyatua risasi za moto kuwatawanya wafanyakazi.
Siku chache baada ya madai hayo, mamlaka ya mpaka ya Misri ilitangaza operesheni ya pamoja na jeshi ili kukabiliana na uhamiaji haramu, magendo ya dawa za kulevya na uchimbaji usio na kibali kando ya mpaka. Kiongozi wa Sudan aliye madarakani kwa sasa naye aliamuru uchunguzi kuhusu mashambulizi hayo yaliyodaiwa, ambayo yaliripotiwa kuua makumi ya watu.
Mwezi huo huo wa Juni, kikosi cha mpaka cha Misri kilitangaza kukamata tani 86 za mawe yenye dhahabu pamoja na vifaa vya uchimbaji vinavyotumiwa na wachimbaji wa kawaida.
Dhahabu imegeuka kuwa chanzo kikuu cha mvutano katika eneo la mpakani, huku vita vya wenyewe kwa wenyewe nchini Sudan vikiwasukuma watu wengi zaidi kugeukia uchimbaji usio rasmi.
Uchimbaji mdogo wa dhahabu hufanywa na raia wanaotumia zana za kawaida, mara nyingi bila kibali rasmi wala tahadhari za kutosha za usalama. Shughuli hiyo imesambaa katika maeneo ya mbali, ikiwemo sehemu za jimbo la River Nile zenye utajiri mkubwa wa dhahabu.
Mipaka isiyolindwa ipasavyo na njia za magendo zilizokwisha kuzoeleka zimeibua hofu kuwa dhahabu inayochimbwa kinyume cha sheria inaweza kuvushwa mpakani na kuuzwa kwa njia zisizo rasmi. Pia kuna wasiwasi kuwa mapato ya biashara hiyo haramu yanaweza kufadhili makundi yenye silaha yanayoshiriki mzozo wa Sudan, na kudhoofisha soko halali la dhahabu nchini Misri.
Comments
0