Viongozi wa soka barani Ulaya wamekubaliana kwa kauli moja kumuunga mkono Rais wa Shirikisho la Soka la Ufaransa, Philippe Diallo, ili kuwania urais wa FIFA dhidi ya Gianni Infantino mwezi Machi 2027, huku kukiwa na wasiwasi kuhusu uongozi na mwelekeo wa shirikisho hilo la soka duniani.
Uamuzi huo ulifikiwa katika kikao kilichoongozwa na Rais wa UEFA, Aleksander Ceferin. Katika kikao hicho, vyama vya soka vya kitaifa vya Ulaya vyenye uwakilishi katika Kamati Tendaji ya UEFA na Baraza la FIFA vilimwalika Diallo kugombea na kuahidi kumpa uungwaji mkono kamili.
Diallo alikubali mwaliko huo, ingawa ugombea wake bado unahitaji kuidhinishwa rasmi na Kamati Tendaji ya Shirikisho la Soka la Ufaransa, ambayo imepangwa kukutana Jumanne.
Uchaguzi wa urais wa FIFA utafanyika Machi 18, 2027, jijini Rabat, Morocco. Infantino, ambaye ameiongoza FIFA tangu mwaka 2016, anatafuta muhula mwingine madarakani.
Kwa mujibu wa kanuni za uchaguzi za FIFA, kila mgombea wa urais lazima apate uteuzi kutoka kwa angalau vyama wanachama vitano ili kustahili kushiriki katika kura.
UEFA ilisema kuunga mkono huko kumetokana na kuongezeka kwa wasiwasi kuhusu mwelekeo wa FIFA. Vyama vya Ulaya vimetoa wito wa kuwepo kwa umoja na uaminifu zaidi katika soka la kimataifa, utawala bora zaidi, ushirikiano ulioimarishwa na wadau wote wa mchezo huo, pamoja na dhamira mpya ya kuendeleza soka duniani kote.
Hatua hii inakuja baada ya Shirikisho la Soka la Ufaransa kuamua mwezi Septemba kuondoa uungaji mkono wake kwa azma ya Infantino kuchaguliwa tena, likitaja wasiwasi kuhusu masuala ya utawala.
Mojawapo ya mivutano mikubwa ilihusu pendekezo la kuanzisha kampuni ya kibiashara inayohusisha haki za Kombe la Dunia na wawekezaji wa nje. Mpango huo hatimaye uliachwa mapema mwezi Agosti baada ya kupingwa na viongozi wa soka wa Ulaya.
Diallo, mwenye umri wa miaka 63, amewahi kushika nyadhifa kadhaa za juu katika soka la Ufaransa na la kimataifa, ikiwemo kuongoza taasisi inayowakilisha klabu za kulipwa nchini Ufaransa na kuhudumu katika bodi ya ligi ya soka la kulipwa nchini humo. Pia amefanya kazi ndani ya mifumo ya FIFA ya kutatua migogoro, inayoshughulikia mizozo katika soka la kulipwa.
Alikuwa rais wa Shirikisho la Soka la Ufaransa kuanzia mwaka 2023, mwaka uleule alipojiunga na Kamati Tendaji ya UEFA, na alichaguliwa tena kuliongoza shirikisho hilo mwezi Desemba 2024.
Ugombea wake unaotarajiwa unaweka changamoto mpya kwa Infantino, mwenye umri wa miaka 56, ambaye ameiongoza FIFA kwa muongo mmoja.
Comments
0