Timbaland Awashtaki Waliokuwa Mameneja Wake kwa Ulaghai, Adai Zaidi ya Dola Milioni 15

Mtayarishaji maarufu wa muziki Timbaland, ambaye jina lake halisi ni Timothy Mosley, amefungua kesi akiwatuhumu waliokuwa meneja wake na meneja wake wa biashara kwa ulaghai, wizi wa kiraia (civil theft) na kukiuka wajibu wa uaminifu, akidai fidia ya zaidi ya dola milioni 15 za Marekani. Hati ya mashtaka yenye kurasa 65 iliwasilishwa Ijumaa katika Mahakama Kuu ya Los Angeles dhidi ya Gary Marella, aliyekuwa meneja wake, na Bruce Seckendorf, aliyekuwa meneja wake wa biashara.

Tuhuma za Kuvunja Uaminifu

Wajibu wa uaminifu (fiduciary duty) ni jukumu la kisheria la kulinda maslahi ya mtu mwingine unaposimamia fedha au biashara yake, na Timbaland anadai wanaume wote wawili waliuvunja. Kwa mujibu wa kesi hiyo, Marella “aliiba mamilioni kupitia kamisheni, ada na marejesho ya gharama ambayo hayakuidhinishwa.” Pia anatuhumiwa kutumia fedha za Timbaland kuwalipa wafanyakazi wake mwenyewe na kughushi kumbukumbu za fedha ili kuficha malipo hayo.

Notisi ya Kunyang’anywa Nyumba

Timbaland anasema aligundua kuwa mambo hayako sawa mwaka 2025, alipopokea notisi ya kunyang’anywa nyumba yake kwa kushindwa kulipa mkopo. Anadai Seckendorf aliacha kulipa rehani ya nyumba hiyo, akaiacha ikaribie kunyang’anywa, na hakuweza kueleza kwa uwazi kwa nini ofisi yake iliacha kufanya malipo bila kumjulisha.

Baada ya hapo, Timbaland aliajiri mawakili huru na washauri wapya wa fedha. Kesi inadai kuwa waligundua malipo yasiyoidhinishwa, mipango ya siri ya kadi za mkopo, mawasiliano yaliyoghushiwa, madeni ambayo hakuwahi kuambiwa, pamoja na mikopo anayosema hakuwahi kuikubali kwa kujua.

Verzuz, Hipgnosis na Beatclub

Baadhi ya kiasi kikubwa cha fedha kinachotajwa kinahusiana na Verzuz, mfululizo wa mashindano ya muziki alioanzisha pamoja na Swizz Beatz. Kesi inadai Marella alijichukulia dola 500,000 zaidi ya alivyostahili kutoka kwenye malipo mawili tofauti ya Verzuz ya dola milioni 5 kila moja.

Timbaland pia anapinga malipo ya Marella kutokana na uuzaji wa hakimiliki za nyimbo zake (catalog) kwa kampuni ya Hipgnosis mwaka 2019, akidai alichukua dola 775,000 zaidi ya kamisheni ya asilimia 10 aliyostahili. Aidha, anamtuhumu Marella kwa kusimamia vibaya Beatclub, soko la midundo walilolianzisha pamoja, na kutumia fedha za Timbaland kufunika matatizo ya kampuni hiyo.

Anachokiomba Mahakamani

Madai mengine ni pamoja na kuficha ukweli kwa udanganyifu, kuvunja mkataba, na kutumia jina na sura ya Timbaland bila ruhusa. Anaiomba mahakama iamuru ukaguzi kamili wa hesabu ili kubaini fedha zake zilikwenda wapi, na iwazuie washtakiwa kuendelea kutumia jina lake kwa manufaa yao binafsi.

Marella Akanusha Madai

Marella amekanusha tuhuma hizo. “Ninapinga tuhuma hizi,” alisema, akimshutumu Timbaland kwa kujaribu kuwalaumu wengine kwa matumizi na maamuzi yake mwenyewe ya kifedha. Anasema Timbaland tayari alikuwa na matatizo ya kifedha walipoanza kufanya kazi pamoja mwaka 2017, na kwamba kwa takriban miaka tisa walizalisha biashara ya karibu dola milioni 75.

Kuhusu uuzaji wa hakimiliki, alisema: “Tim alikuwa anafahamu kikamilifu kamisheni ya asilimia 15 niliyopokea kwenye mauzo ya hakimiliki kwa Hipgnosis.” Anaongeza kuwa meneja wa biashara alimlipa kwa idhini ya Timbaland. Seckendorf bado hajajibu hadharani kuhusu kesi hiyo.