Chris Brown Akabiliwa na Kifungo kwa Shambulio la ‘Kikatili’ Kwenye Klabu ya Usiku London Mwaka 2023

Mwimbaji wa Marekani, Chris Brown, anatarajiwa kuhukumiwa katika Mahakama ya Southwark Crown kufuatia shambulio dhidi ya mtayarishaji wa muziki Abe Diaw katika klabu ya usiku jijini London mwezi Februari 2023.

Akiri Kosa la Vurugu

Brown, mwenye miaka 37, alikiri mwezi Julai kosa la kufanya vurugu hadharani (affray), baada ya waendesha mashtaka kumtuhumu kufanya kile walichokiita “shambulio la kikatili lisilo na uchokozi wowote”. Awali alitarajiwa kusimama kizimbani kwa mashtaka mazito zaidi, ambayo aliyakana, lakini mashtaka hayo yalifutwa baadaye.

Mashtaka Yaliyofutwa

Mashtaka yaliyofutwa ni pamoja na kushambulia, kujaribu kusababisha madhara makubwa ya mwili, na kumiliki silaha ya kudhuru.

Kilichonaswa na Kamera za CCTV

Polisi walisema picha za kamera za CCTV zilimwonyesha Brown akimpiga Diaw kichwani mara kadhaa kwa chupa ya kioo. Diaw alipata majeraha ya kichwa na goti, na alihitaji matibabu hospitalini. Shambulio hilo lilitokea katika klabu moja eneo la Mayfair, London, tarehe 19 Februari 2023.

Kocha Wake wa Sauti Naye Akiri

Kocha wa sauti wa Brown, rapa Omololu Akinlolu mwenye miaka 40, naye alikiri kosa la vurugu hadharani kuhusiana na tukio hilo. Mashtaka ya kushambulia na kujaribu kusababisha madhara makubwa ya mwili dhidi yake yalifutwa.

Adhabu Inayoweza Kutolewa

Kosa la vurugu hadharani linahusisha kutumia au kutishia kutumia nguvu kwa namna inayomfanya mtu mwingine kuhofia usalama wake. Adhabu ya juu kabisa kwa kosa hilo ni kifungo cha miaka mitatu jela.

Mahakama inatarajiwa kutoa maelezo yake ya hukumu, ambayo yataonyeshwa moja kwa moja.