Meta na Apple Washirikiana Kuendesha Modeli ya AI Kwenye Kompyuta za Mac Studio

Meta na Apple zimetangaza ushirikiano utakaowawezesha wasanidi programu kuendesha modeli mpya ya akili bandia (AI) ya chanzo huria (open-source) ya Meta, Muse Spark Open, kwenye kompyuta za juu za mezani za Apple, Mac Studio.

Ushirikiano Wafunguliwa

Ushirikiano huo, ulioetangazwa Alhamisi, utawawezesha wasanidi programu kutumia modeli hiyo ya AI kwa kazi za uandishi wa nambari (coding), uchambuzi wa video na majukumu mengine yanayohusisha mawakala wa AI wanaojiendesha wenyewe, huku teknolojia hiyo ikiendeshwa papo hapo kwenye kompyuta za watumiaji badala ya kutegemea huduma za wingu (cloud).

Kwa mujibu wa Meta, Muse Spark Open ni modeli yenye vigezo bilioni 816 iliyotolewa chini ya leseni inayoruhusu matumizi finyu ya kibiashara. Muundo wake wa chanzo huria unawaruhusu wasanidi programu kupakua vigezo vya modeli hiyo na kuiendesha kwenye vifaa vinavyoendana nayo.

Upatikanaji kwa Wasanidi Programu

Wasanidi programu wanaweza kupakua modeli hiyo kutoka kwenye majukwaa kama Hugging Face bila kuhitaji mipangilio ya ziada kwa ajili ya chip za Apple. Meta pia imeboresha modeli hiyo ili iende kwa kasi zaidi kwenye vifaa vya Apple.

Apple ilichapisha nyaraka za kiufundi zinazoeleza jinsi mfumo wake wa AI wa MLX unavyoweza kusambaza modeli za chanzo huria kwenye kompyuta nyingi. Kampuni hiyo pia ilitoa vipimo vipya (benchmarks) kwa ajili ya chip zake.

Mahitaji ya Vifaa

Watumiaji wataweza kuunganisha kati ya kompyuta mbili na nne za Mac Studio ili kuendesha modeli hiyo. Makampuni hayo yalisema kuendesha teknolojia hiyo papo hapo kunaweza kuimarisha usalama na kupunguza gharama zinazohusiana na kompyuta za wingu.

Hata hivyo, kuendesha modeli hiyo kunahitaji uwekezaji mkubwa wa vifaa. Mac Studio yenye chipu inayohitajika ya M5 Ultra na kumbukumbu ya GB 256 inagharimu angalau dola 10,799, huku toleo ghali zaidi lenye kumbukumbu ya GB 512 likitarajiwa baadaye mwezi Oktoba. Watumiaji pia watahitaji mashine kadhaa kuendesha modeli hiyo kama ilivyoelezwa na makampuni hayo.

Maoni ya Viongozi wa Makampuni Hayo

Afisa Mkuu wa AI wa Meta, Alexandr Wang, alisema modeli nyingi zenye nguvu za chanzo huria ni kubwa mno kuendeshwa kwenye kompyuta nyingi za kawaida, lakini mifumo ya Mac Studio ya Apple inatoa uwezo wa kumbukumbu unaohitajika kuifanya Muse Spark Open kuwa na manufaa kwa wasanidi programu.

Wang alisema ushirikiano huo ulibuniwa kuleta uwezo wa hali ya juu wa mawakala wa AI kwenye kompyuta za mezani za watumiaji kupitia kompyuta za Mac Studio zinazotumia chipu ya M5 Ultra ya Apple.

Mkurugenzi Mtendaji wa Meta, Mark Zuckerberg, aliupokea ushirikiano huo kwa furaha katika chapisho lake kwenye X, akishiriki picha ya wakala wa AI wa Meta ukiendeshwa kwenye kompyuta ya Mac. “Muse Spark Open — vigezo vyake vinatolewa leo — vinafanya kazi vizuri sana kwenye Mac Studio mpya kutokana na kazi tuliyofanya na @johnternus na Apple,” aliandika Zuckerberg.

Mkurugenzi Mtendaji wa Apple, John Ternus, naye alisifu maendeleo hayo, akisema Mac Studio inaweza kuendesha kwa ufanisi modeli ya AI yenye ukubwa wa Muse Spark Open moja kwa moja kutoka kwenye madawati ya watumiaji.

Historia ya Uhusiano Kati ya Makampuni Hayo

Ushirikiano huo unaashiria maendeleo muhimu katika uhusiano kati ya makampuni hayo mawili ya teknolojia, ambayo viongozi wake wamekuwa wakigombana hadharani kuhusu faragha, mbinu za kibiashara na udhibiti wa majukwaa ya kidijitali.

Mabadiliko ya sera ya faragha ya Apple mwaka 2021 yalipunguza uwezo wa makampuni ya matangazo ya kidijitali kufuatilia watumiaji katika programu mbalimbali. Meta ilikadiria mwanzoni mwa mwaka 2022 kuwa mabadiliko hayo yangepunguza mapato yake ya mwaka huo kwa dola bilioni 10.

Apple na Meta zilishirikiana hapo awali katika uunganishaji wa iPhone zaidi ya muongo mmoja uliopita, lakini ushirikiano wao wa hadharani ulikoma kwa kiasi kikubwa baada ya Apple kuondoa muunganiko wa Facebook kwenye mfumo wa iPhone mwaka 2017.

Wang alikiri historia ngumu kati ya makampuni hayo lakini alitaja uwepo wa mtafiti wa AI na aliyekuwa mkurugenzi wa Apple, Daniel Gross, katika timu ya Meta kama mojawapo ya sababu za ushirikiano huo.

Mikakati ya AI ya Meta na Apple

Hatua hii ya hivi karibuni ya Meta pia inaonyesha juhudi zake za kuendelea kupanua uwezo wake wa AI. Kampuni hiyo awali ilijikita zaidi kwenye modeli zake za chanzo huria za Llama kabla ya kuhamisha mwelekeo mkubwa zaidi kwenye mifumo yake ya AI ya kimiliki chini ya uongozi wa Wang.

Ingawa Muse Spark Open si ya hali ya juu kama modeli ya kimiliki ya Meta, Muse Wonder, iliyotolewa mapema wiki hii, Wang alisema toleo la chanzo huria linaweza kuvutia wasanidi programu na makampuni yanayotaka kujaribu AI kabla ya kupanua matumizi yao ya teknolojia hiyo.

“Hizi si modeli zenye uwezo mkubwa zaidi ambazo tumezitengeneza au kuzitoa,” alisema Wang, akiongeza kuwa kampuni hiyo inatarajia wasanidi programu waanze kutumia modeli hiyo kwa kiwango kidogo kabla ya kuongeza matumizi yao.

Kwa upande wa Apple, ushirikiano huo unawakilisha hatua nyingine katika juhudi zake za kuimarisha huduma zake za AI na kuonyesha uwezo wa chipu zake.

Kampuni hiyo pia imeshirikiana na OpenAI kuunganisha ChatGPT kwenye Siri na kufikia makubaliano na Google kutumia modeli zake za Gemini katika Apple Intelligence.

Hata hivyo, mkakati wa AI wa Apple umekabiliwa na ukosoaji kutoka kwa wawekezaji na wateja kuhusu utendaji wa toleo lake la hivi karibuni la Siri ikilinganishwa na mifumo shindani ya mazungumzo na mawakala wa AI.

Meta, kwa upande wake, imekuwa ikiwekeza kwa kiasi kikubwa katika maendeleo ya AI huku ikilenga kujiimarisha kama kinara katika sekta hiyo na kutafuta fursa mpya za kibiashara zaidi ya shughuli zake zinazotegemea matangazo.

Hakuna kampuni iliyoweka wazi kama ushirikiano wa Muse Spark Open utasababisha ushirikiano mpana zaidi.